СЭЗДС -ийн багш Докторант Д.Гэрэлмаа, П.Эрдэнэ нарын гаргасан нэгэн нийтлэлийг хүргэлээ. Хүний нөөцийн чиглэлээр мэргэших гэж байгаа оюутнуудад онцгой хэрэгтэй нийтлэл юм шиг санагдсан. Зохиогчоос нь ямар нэгэн зөвшөөрөл авч амжаагүй байгаа. Гэхдээ блогт оруулсан гэдгээ заавал мэдэгдэнэ ээ. За тэгээд санаа оноо юу байна, хэлэлцэх хэсэгт бичээрэй. 

МЭРГЭЖЛИЙН УР ЧАДВАР УУ, БАГААР АЖИЛЛАХ ЧАДВАР УУ?

Орчин үед ихэнх компаниуд байгууллагынхаа үндсэн түлхүүр нөөцийг хүний нөөц гэж үздэг. Учир нь байгууллагын гол хөдөлгөгч хүч бол хүн байдаг. Байгууллага хүнийг ажиллуулан, хүнд хэрэгцээт зүйлийг санал болгож, хүнээр удирдуулж байдаг. Бүлэг хүмүүсийн үйл ажиллагааг нэгтгэн чиглүүлж өгөх нь хүний нөөцийн удирдлагын гол үүрэг болно. Бүлэг хүмүүс анхандаа бие биеэсээ огт хамааралгүй, тус тусын амьдрал, зан төрх, үзэл бодол, үнэт зүйлстэй, зөвхөн хувийн хэрэглээнд тулгуурлан үйлдэл хийж байдаг бөгөөд ийм хувь хүмүүсийг нэгдсэн зорилготой болгох нь хүнд хэцүү хэрнээ зайлшгүй шаардлагаас үүдэн гардаг удирдлагын үйлдэл юм. Монголчууд зан төлөвийнхөө хувьд амиа хичээх үзэл бодол давамгайлсан, хамтран үйл ажиллагаа эрхлэх чадваргүй, бусдын өмнө хүлээх нийгмийн хариуцлага төлөвшөөгүй зэрэг өвөрмөц шинж чанаруудтай байдаг нь нүүдэлчдийн соёл, амьдрал ахуйн онцлогтой холбоотой юм.